वा! सोलापूरच्या आरोग्य सेवेचा डंका राष्ट्रीय स्तरावर!

जिल्ह्यातील ३९ आरोग्य मंदिरे झालीत NQAS ब्रँडेड

सोलापूर : दक्षिण सोलापूर तालुक्यातील उळे गावाने आरोग्य क्षेत्रात मोठी भरारी घेतली आहे! जिल्हा परिषदेचे सीईओ कुशल जैन, जिल्हा आरोग्य अधिकारी डॉ. सतीश कोपुरवाड व अतिरिक्त जिल्हा आरोग्य अधिकारी डॉ. नंदकिशोर घाडगे यांच्या मार्गदर्शनाखाली बोरामणी PHC अंतर्गत येणाऱ्या उळे येथील आयुष्यमान आरोग्य मंदिराने राष्ट्रीय गुणवत्ता आश्वासन मानांकन (NQAS) परीक्षेत तब्बल ९० टक्के गुण मिळवत राष्ट्रीय स्तरावर आपली गुणवत्ता सिद्ध केली आहे.

केंद्र सरकारच्या राष्ट्रीय आरोग्य अभियानांतर्गत (NHM) रुग्णसेवा, स्वच्छता, रुग्ण सुरक्षा, औषध व्यवस्थापन, प्रभावी सेवा वितरण अशा कठोर निकषांवर तपासणी करून हे मानांकन दिले जाते. या परीक्षेत उळे आरोग्य मंदिराने बाजी मारल्याने आता येथील नागरिकांना अधिक सुरक्षित आणि दर्जेदार आरोग्यसेवा मिळणार आहे. हे यश मिळवण्यासाठी समुदाय आरोग्य अधिकारी डॉ. मंजुषा देशमुख, आरोग्य सेविका कल्पना सावंत, आरोग्य सेवक शुभेंद्र काळे, आशा स्वयंसेविका सत्यभामा साठे, शीतल माळी, फरहाना शेख आणि अर्धवेळ परिचर माधुरी शिंदे यांनी अहोरात्र परिश्रम घेतले.

जिल्ह्यातील सर्वच आरोग्य संस्थांना NQAS मानांकित करण्याचे उद्दिष्ट सीईओ कुशल जैन यांनी ठेवले असून, आतापर्यंत जिल्ह्यातील तब्बल ३९ आयुष्यमान आरोग्य मंदिरांना हे मानांकन प्राप्त झाले आहे. उर्वरित आरोग्य संस्थांचे इन्स्पेक्शन युद्धपातळीवर सुरू असल्याची माहिती सीईओ जैन यांनी दिली आहे.

…..