ठेकेदारांकडून संत गतीने काम सुरू, वाहनचालक त्रस्त!
मंद्रूप:
ठेकेदाराचा संथ कारभार आणि सार्वजनिक बांधकाम विभागाच्या अधिकाऱ्यांचे दुर्लक्ष यामुळे मंद्रूप -निंबर्गी -भंडारकवठे हा मार्ग सध्या वाहनचालकांसाठी ‘अपघात मालिका’ बनला आहे. रस्त्याच्या रखडलेल्या कामामुळे अपघातांची मालिका सुरूच असून, निष्पाप नागरिकांचे जीव टांगणीला लागले आहेत. सहा महिन्यांपासून या रस्त्याचे काम अत्यंत संथ गतीने सुरू आहे. रस्ता जागोजागी खोदून ठेवल्यामुळे धुळीचे साम्राज्य निर्माण झाले आहे, ज्यामुळे समोरचे वाहन दिसणे कठीण झाले आहे. तसेच नवीन रस्ता करण्या साठी जेसीबी द्वारे रस्त्यावर चर मारण्यात आली आहे त्यामुळे हा रस्ता खरबरीत बनला आहे. रस्त्यावरील खड्ड्यांमुळे आणि अर्धवट कामामुळे दुचाकी व चारचाकी वाहने घसरून रोज छोटे-मोठे अपघात होत आहेत.
ठेकेदाराच्या संथ कामावर नियंत्रण ठेवण्यात संबंधित अधिकारी पूर्णपणे अपयशी ठरले आहेत. रोज प्रवास करणारे नोकरदार, शेतकरी आणि रुग्णांना या रस्त्यावरून जाताना मरणयातना सहन कराव्या लागत आहेत. वाहनांचेही मोठे नुकसान होत आहे. संबंधित विभागाचे अधिकाऱ्याकडे तक्रार करूनही त्याकडे जाणीवपूर्वक दुर्लक्ष होत असल्यामुळे वाहनधारकांकडून संताप व्यक्त करण्यात येत आहे.
“एखाद्या मोठ्या जीवितहानीची वाट प्रशासन पाहत आहे का ?” ठेकेदाराने नवीन रस्ता बनवण्यासाठी रस्त्यावर चर मारली आहे त्यामुळे अपघात होत आहेत. ठेकेदाराने तात्काळ कामाची गती वाढवून रस्ता वाहतुकी साठी सुरक्षित न केल्यास, रस्ता रोको आंदोलन करण्यात येणार आहे .
खाजाभाई शेख , वाहन चालक , भंडारकवठे
________________
*बातम्या व जाहिरातीसाठी संपर्क करा -*
*संपादक :- अमोगसिद्ध मुंजे*
मो. 9423535294
