आजी व माजी आमदारांची प्रतिष्ठा पणाला
उमेदवारी फाॅर्मवरून दोनही गट आमनेसामने
सोलापूर …
दक्षिण सोलापूर तालुक्यातील ३ जिल्हा परिषद व ६ पंचायत समिती जागांच्या उमेदवारीवरून आमदार सुभाष देशमुख व माजी आमदार दिलीप माने यांची प्रतिष्ठा पणाला लागली आहे. दोन्ही गटाकडून भाजपाची उमेदवारी अर्जासोबत पक्षाचे एबी फाॅर्म जोडण्यात आल्याने दोनही गटाचे कार्यकर्ते आमनेसामने आले आहेत. त्यामुळे भाजपाकडून अधिकृत उमेदवारी कोणाला मिळणार ? हे गुरूवारी स्पष्ट होणार आहे. मात्र बुधवारी रात्रभर भाजपाच्या पदाधिकार्यांची खलबते सुरू राहणार असून यामध्ये कोणत्या उमेदवाराचे नशिब उज्वल ठरणार ? हे स्पष्ट होणार आहे.
सोलापूर महानगरपालिका निवडणूकीत भाजपाने १०२ पैकी ८७ जागा जिंकून निर्विवाद वर्चस्व मिळविला आहे. या निवडणूकीत पालकमंत्री जयकुमार गोरे, आमदार सचिन कल्याणशेटी व आमदार देवेंद्र कोठे यांनी उमेदवारी वाटपात आघाडी घेऊन अधिकाधिक कार्यकर्त्यांना व नवख्या उमेदवारांना संधी दिल्याने भाजपाचे अधिक उमेदवार निवडून आले. त्यामुळे पालकमंत्री गोरे हे आमदार सचिन कल्याणशेटी व माजी आमदार दिलीप माने यांच्या अधिकाधिक कार्यकर्त्यांना दक्षिणमधील जिल्हा परिषद व पंचायत समिती निवडणूकीत संधी दिली आहे. तर दुसरीकडे आमदार सुभाष देशमुख यांच्या निकटवर्तियांची उमेदवारी डावलण्यात आल्याने भाजपा कार्यकर्त्यांमध्ये नाराजी निर्माण झाली आहे. त्यामुळे दक्षिणमधील भाजपा अधिकृत उमेदवारी नावावरून बुधवारी दिवसभर गोंधळ दिसून येत होता. कार्यकर्त्यांवरील अन्यासाठी आमदार सुभाष देशमुख कठोर निर्णय घेणार असल्याची चर्चा सुरू आहे.
दक्षिणमधील तीन जिल्हा परिषद गटापैकी माने गटाने दोन जिल्हा परिषद गटावर उमेदवारी जाहीर केली आहे. तर आमदार देशमुख गटाने तीनही जागांवर उमेदवार जाहीर केला आहे. शिवाय पंचायत समिती निवडणूकीतही एकाच जागेसाठी दोन दोन एबी फाॅर्म दिल्याने भाजपाच्या अधिकृत उमेदवारीवरून चुरस निर्माण झाली आहे. त्यामुळे आमदार देशमुख गटाचे उमेदवार विकासनगर येथे ठिया मारून होते. यावेळी आमदारांनी उमेदवारांसाठी पक्षाच्या वरीष्ठांशी आग्रह धरण्याची मागणी करण्यात आल्याचे सांगण्यात येते. त्यामुळे आमदार देशमुख अॅक्शन मोडवर असल्याचे सांगण्यात येते. ते काय निर्णय घेतात ? हे गुरुवारी स्पष्ट होणार आहे.
भाजपासारख्या शिस्तबध्द पक्षाच्या दोनही गटाकडून वेगवेगळे एबी फाॅर्म देण्यात आल्याने कार्यकर्त्यांमध्ये नाराजी दिसून येत आहे. बुधवारी रात्री भाजपा जिल्हाध्यक्ष यांच्या शिफारशीने अंतिम उमेदवारी यादी प्रसिध्द होणार असल्याचे सांगण्यात येत असले तरी यामध्ये कोणत्या गटावरील उमेदवारावर अन्याय होणार ? हे पाहावे लागेल. मात्र पालकमंत्री गोरे, आमदार कल्याणशेटी व माजी आमदार माने हे आपल्या कार्यकर्त्यांना उमेदवारी मिळवून देण्यात बाजी मारणार असल्याचा अंदाज व्यक्त करण्यात येत आहे.
