दक्षिणमध्ये जिल्हा परिषदेच्या ६ जागांसाठी ७३ अर्ज ,
पंचायत समितीच्या १२ जागांसाठी १४५ अर्ज
सोलापूर,..
जिल्हा परिषद पंचायत समितीच्या उमेदवारी अर्ज भरण्याच्या शेवटच्या दिवशी इच्छुकांकडून मोठ्या प्रमाणात अर्ज दाखल करण्यात आल्यामुळे निवडणुकीत चुरस दिसून येत आहे. दक्षिण मधील सहा जिल्हा परिषद जागांसाठी बुधवारी शेवटच्या दिवशी ५० उमेदवारांनी अर्ज दाखल केला असून एकूण ७३ अर्ज दाखल झाली आहेत. तर पंचायत समितीच्या १२ जागांसाठी शेवटच्या दिवशी ९९ उमेदवारांनी अर्ज दाखल केला असून एकूण १४५ उमेदवारांकडून अर्ज दाखल करण्यात आला आहे. पंचायत समितीच्या निवडणुकीमध्ये सर्वच पक्षांकडून उमेदवारी दाखल करण्यात आले असून निवडणूकीचा अंतिम चित्र २७ जानेवारीला स्पष्ट होणार आहे .
दक्षिण मध्ये प्रथमच भाजपाकडून एका जागेसाठी दोन दोन एबी फॉर्म देण्यात आल्यामुळे मोठ्या प्रमाणात गोंधळ झाला . त्यामुळे इच्छुकांमध्ये नाराजी दिसून येत आहे.
यावर पक्षश्रेष्ठी काय तोडगा काढणार ? याकडे सर्वांचे लक्ष लागून राहिले आहे . बुधवारी उमेदवारी अर्ज दाखल करण्याच्या शेवटच्या दिवशी दक्षिण तहसील कार्यालयासमोर इच्छुकांसह कार्यकर्त्यांची मोठ्या प्रमाणात गर्दी दिसून आली. यावेळी भाजपाकडून उमेदवारी व एबी फॉर्म मिळण्यासाठी नेत्यांसह कार्यकर्त्यांची धावपळ सुरू होती.
माजी आमदार दिलीप माने व भाजपाचे माजी जिल्हाध्यक्ष शहाजी पवार यांनी भाजपाचे एबी फॉर्म निवडणूक कार्यालयात सादर केले. तर दुसरीकडे आमदार सुभाष देशमुख यांच्या कार्यालयातून दीपक चोपडे यांच्यामार्फत एबी फॉर्म देण्यात आले . त्यामुळे भाजपामध्ये उमेदवारासाठी रस्सीखेच सुरू असताना गटबाजी दिसून येत होती. नऊ वर्षानंतर होत असलेल्या जिल्हा परिषद निवडणूकीसाठी शेवटच्या दिवशी बोरामणी १६, कुंभारी ५, वळसंग १२, हत्तूर ३, मंद्रूप ७ व भंडारकवठे ७ अर्ज दाखल करण्यात आले . तर पंचायत समितीच्या १२ जागांसाठी बोरामणी ६, कुंभारी ७, वळसंग ९, हत्तूर ११, मंद्रूप ८, भंडारकवठे ४, कासेगाव १३, धोत्री ५, होटगी १४, औराद १०, कंदलगाव ९, व निंबर्गी ३ दाखल करण्यात आले. जिल्हा परिषदेच्या ६ जागांसाठी ७३ तर पंचायत समितीच्या १२ जागांसाठी १४५ अर्ज दाखल झाले असून निवडणूक बहुरंगी होणार असल्याचे स्पष्ट होत आहे. मात्र भाजपामधील गटबाजीवर पक्षश्रेष्ठी काय निर्णय घेणार ? याकडे कार्यकर्त्यांचे लक्ष लागून राहीले आहे.
