आमदार कल्याणशेटी गटाकडून उमेदवारी मिळविण्यात यशस्वी
सोलापूर…
दक्षिण तालुक्याचे लक्ष वेधून घेतलेल्या मंद्रूप गणाच्या आखाड्यातील कुस्ती आमदार सचिन कल्याणशेटी यांच्या ताकदीमुळे मळसिध्द मुगळे यांनी पहिल्या डावातच मारली. त्यामुळे आमदार सुभाष देशमुख यांच्या कार्यकर्त्यांनी सर्व शक्ती पणाला लावल्यानंतरही मुगळे यांची उमेदवारी रद्द करण्यात अयशस्वी ठरले. त्यामुळे देशमुख गटाला धक्का मानला जात आहे. मुगळे यांच्या उमेदवारीसाठी आमदार कल्याणशेटी यांनीही सर्व ताकद लावल्याने मुगळे यांची उमेदवारी शाबूत राहील्याचे सांगण्यात आले.
विधानसभा निवडणुकीत मळसिध्द मुगळे यांनी आमदार सुभाष देशमुख यांच्या उमेदवारीवेळी भूमिपूत्राच्या मुद्यावरून रणशिंग फुंकला होता. त्यासाठी त्यांनी पक्षाकडे उमेदवारीची मागणीही केली होती. मात्र आमदार देशमुख यांनी उमेदवारी मिळवून निवडणुकीत विजय मिळविल्यानंतर देशमुख व मुगळे यांच्यामध्ये राजकीय विरोध वाढत गेला. त्यामुळे मुगळे यांना पंचायत समिती उमेदवारी मिळू नये, यासाठी आमदार देशमुख यांच्या गटातील अनेक पदाधिकार्यांनी प्रयत्न केला. त्यासाठी मंद्रूपचे हर्षवर्धन देशमुख यांच्या उमेदवारीची चर्चा झाली. तसेच अखेरच्या क्षणी मंद्रूपचे तंटामुक्त अध्यक्ष रेवणसिध्द मेंडगुदले यांना भाजपकडून एबी फाॅर्म देऊन मुगळे यांना आव्हान देण्यात आले. अर्ज छाननीवेळी मेंडगुदले व मुगळे यांच्याकडून एकमेकांविषयी हरकत घेण्यात आली. अखेर मळसिध्द मुगळे यांनी उमेदवारी मिळविण्यात बाजी मारल्याने देशमुख गट नाराज झाल्याचे दिसुन आले.
