आदर्श ग्रामसेवकांचा शासनाकडून होणार सन्मान
सोलापूर …
महाराष्ट्र राज्य ग्रामसेवक संघटनेने जिल्ह्यातील ग्रामपंचायतीमध्ये सर्वोत्कृष्ट कार्य करणाऱ्या ग्रामसेवक यांना आदर्श ग्रामसेवक म्हणून सन्मानित करण्याची शासनाकडे मागणी केली होती. त्यानुसार जिल्हा परिषद स्तरावर अतिउत्कृष्ट काम करणाऱ्या ग्रामसेवक यांना शासन स्तरावरुन यशवंत पंचायत राज अभियान पुरस्कार वितरण सोहळ्यात पुरस्कार देण्यात येतात. सन २०२०-२१ व सन २०२१-२२ या कालावधीत कोविड-१९ च्या प्रादुभावामुळे पुरस्कार जाहिर केले नाही. त्यामुळे राज्य शासनाने आता या दोन्ही वर्षाकरीताचे आदर्श ग्रामसेवक पुरस्काराची यादी जाहीर केली असून यामध्ये सोलापूर जिल्ह्यातील दोन ग्रामसेवकांचा समावेश आहे. यामध्ये बार्शी तालुक्यातील यावलीचे ग्रामसेवक किरण वाघमारे व मंगळवेढा तालुक्यातील ब्रम्हपुरीचे ग्रामसेवक संजय शिंदे यांना पुरस्कार जाहीर झाला आहे.
प्रत्येक जिल्ह्यातुन एक या प्रमाणे सर्वोत्कृष्ट ठरणाऱ्या ग्रामसेवक यांना आदर्श ग्रामसेवक पुरस्कार ग्रामविकासमंत्री यांच्या हस्ते यशवंत पंचायत अभियान पुरस्कार वितरण सोहळ्याच्या वेळी वितरीत करण्यात येतो. सर्वोत्कृष्ट ग्रामसेवक म्हणून निवड झालेल्या ग्रामसेवकांना प्रशस्तीपत्रक देण्यात येते. त्यानुसार राज्यातील आठ विभागातून ३० ग्रामसेवकांना राज्यस्तरीय आदर्श ग्रामसेवक पुरस्कार सन २०२०-२१ व सन २०२१-२२ या वर्षासाठी जाहीर झाला आहे. पुरस्कार मिळालेल्या ग्रामसेवकांचे जिल्हा परिषदेचे मुख्य कार्यकारी अधिकारी कुलदीप जंगम, अतिरिक्त मुख्य कार्यकारी अधिकारी संदिप कोहीणकर , उपमुख्य कार्यकारी अधिकारी प्रशासन विभाग स्मिता पाटील व ग्रामपंचायत विभाग उपमुख्य कार्यकारी अधिकारी सूर्यकांत भुजबळ यांनी अभिनंदन केला आहे.
