हत्तूर जिल्हा परिषद गटात धनुष्यबाण चालणार?
सोलापूर…
हत्तूर जिल्हा परीषद गटातून शिवसेना जिल्हा प्रमुख अमर पाटील यांच्या मातोश्री लक्ष्मीताई पाटील निवडणूक लढवित आहेत. हत्तूर जिल्हा परीषद गट हा अमर पाटील यांचा होमपीच आहे. हा होमपीच काबीज करण्यासाठी पाटील यांची कसोटी पणाला लागली आहे. त्यामुळे पाटील व हविनाळे या युध्दात पाटील विजयी होणार का ? हे पाहावे लागेल.
२०१७ मध्ये हत्तूर जिल्हा परीषद गटासाठी अमर पाटील, अप्पासाहेब पाटील व डाॅ. चनगोंडा हविनाळे यांच्यात सामना रंगला होता. यामध्ये अमर पाटील विजयी झाले. त्यामुळे पाटील व हविनाळे यांची राजकीय सामना पुन्हा एखदा अनुभवास येणार आहे. मात्र यावेळी दुरंगी लढत होत असून सत्ताधारी भाजपकडून उज्वला हविनाळे या खिंड लढवित असल्यामुळे पाटील यांच्यासाठी ही निवडणूक अस्तित्वाची ठरणार आहे. मागील निवडणूकीतील अनेक सहकारी व कार्यकर्ते पाटील यांना सोडून भाजपमध्ये गेल्यामुळे पाटील यांना मतदारसंघ पिंजून काढून नवीन कार्यकर्त्यांची फळी तयार करावी लागणार आहे. डाॅ. हविनाळे यांचा जनसंपर्क व कार्यकर्त्यांची फळी यामुळे ते प्रचारात आघाडीवर दिसून येत आहेत.
अमर पाटील या शिवसेना शिंदे गटाचे जिल्हाप्रमुख झाल्यापासून दक्षिणमध्ये पक्षविस्तार न झाल्याने उमेदवारी मिळविताना अडचणी निर्माण झाले. शिवसेना स्वतंत्र निवडणूक लढवित असल्यामुळे अनेक ठिकाणी उमेदवारांची दमछाक होणार आहे. पाटील यांनी जुने सवंगडीच घेऊन रणांगण गाजवित असल्यामुळे निवडणूकीतील रणनीतीविषयी चर्चा सुरू आहे. माजी आमदार रतिकांत पाटील यांना मानणारा वर्ग असला तरी आमदार सुभाष देशमुख हत्तूर गटावर विशेष लक्ष केंद्रीत केल्याने पाटील यांच्यासाठी ही निवडणूक सोपी नाही. त्यामुळे शिवसेना जिल्हाप्रमुख अमर पाटील यांची कसोटी पणाला लागली आहे.
