१८ जून रोजी सकाळी ८ ते दुपारी ४ वाजेपर्यंत मतदान
सोलापूर :- सोलापूर जिल्ह्यातील विधान परिषद स्थानिक प्राधिकारी मतदार संघाच्या द्विवार्षिक निवडणुकीसाठी ६१६ मतदार असून सोलापूर विधानपरिषदेचा ठरविणार आहेत. यासाठी प्रशासकीय यंत्रणा सज्ज झाली आहे. जिल्ह्यातील सहा मतदान केंद्रावर एकूण ६१५ मतदार(एक मतदार मयत) मतदानाचा हक्क बजावणार आहेत. मतदान १८ जून रोजी सकाळी ८ ते दुपारी ४ या वेळेत होणार असून मतमोजणी २२ जून रोजी सकाळी ८ वाजता नियोजन भवन, नवीन जिल्हाधिकारी कार्यालय, सोलापूर येथे होणार आहे. संपूर्ण निवडणूक प्रक्रिया २५ जूनपर्यंत पूर्ण होणार आहे.
जिल्ह्यातील स्थानिक स्वराज्य संस्थांमध्ये एक जिल्हा परिषद, एक महानगरपालिका व १७ नगरपरिषद/नगरपंचायत अशा एकूण १९ संस्था असून त्यातील मतदारसंख्या ५४४ आहे. याशिवाय ४९ नामनिर्देशित व २३ अध्यक्ष मिळून एकूण मतदारसंख्या ६१६ इतकी आहे.यामध्ये जिल्हा परिषद सदस्य ६८, पंचायत समिती सभापती ११, सोलापूर महानगरपालिका नगरसेवक १०२, स्वीकृत अथवा नामनिर्देशित सदस्य ९ , नगरपालिका आणि नगर पंचायतमधिल सदस्य ३७४, नामनिर्देशित ४० व नगर पंचायत अध्यक्ष १२ असे एकूण ६१६ मतदार मतदानाचा हक्क बजाविणार आहेत.
निवडणुकीसाठी एकूण १५ नामनिर्देशन अर्ज दाखल झाले होते. अंतिमतः २ उमेदवार निवडणुकीत उभे राहिले आहेत.
जिल्ह्यात एकूण ६ मतदान केंद्रे निश्चित करण्यात आली आहेत. कुर्डूवाडी येथे ८०, उत्तर सोलापूर येथे १८८, दक्षिण सोलापूर येथे ८९, पंढरपूर येथे १००, मंगळवेढा येथे ६२ व अकलूज येथे ९७ मतदारांची व्यवस्था असून पुरुष व महिला मतदारांची संख्या प्रत्येकी ३०८ अशी आहे.मतदान केंद्रांवर तहसीलदार हे केंद्राध्यक्ष असतील. नायब तहसीलदार, अव्वल कारकून, लिपिक व शिपाई यांची नेमणूक मतदान अधिकारी व कर्मचारी म्हणून करण्यात आली आहे.
मतदानासाठी मतदारांनी उमेदवाराच्या नावासमोर पसंतीक्रम अंकात लिहावा लागणार आहे. पहिली पसंती दर्शविण्यासाठी ‘१’ अंक लिहिणे बंधनकारक आहे. भारत निवडणूक आयोगाने पुरविलेला जांभळा स्केचपेन वापरणे आवश्यक आहे. अंक शब्दांत लिहिल्यास किंवा चुकीच्या पद्धतीने नोंदवल्यास मतपत्रिका अवैध ठरेल.
__________________________________
*🛑नवप्रभात न्युज पोर्टल ला बातम्या व जाहिरातीसाठी संपर्क करा*
*संपादक :- अमोगसिद्ध मुंजे*
*9423535294*
