आमदार सुभाष देशमुख यांच्या हस्ते नवीन एसटीचे पूजन
बापू, एसटी आल्या, आता नियंत्रकांना आणा ! प्रवाशांची मागणी
—
दक्षिण सोलापूर :
मंद्रूप व परिसरातील विद्यार्थी, नोकरदार आणि सर्वसामान्य प्रवाशांची अनेक दिवसांची मागणी अखेर पूर्ण झाली आहे. सोलापूर (रंगभवन) ते मंद्रूप नवीन एसटी बस सेवा १ सप्टेंबरपासून प्रत्यक्ष सुरू झाली असून, दक्षिण सोलापूरचे लोकप्रिय आमदार सुभाष देशमुख आणि माजी ग्रामपंचायत सदस्य तमण्णा पुजारी यांच्या हस्ते नवीन बसचे पूजन करण्यात आले. यावेळी सोलापूर आगाराचे सहव्यवस्थापक मल्लिकार्जुन अंजुटगी, उपसरपंच भगवान व्हनमाने, भाजपा सरचिटणीस गौरीशंकर मेंडगुदले, माजी सरपंच विश्वनाथ हिरेमठ , शिवानंद लाभे, दयानंद ख्याडे, मळसिद्ध पुजारी, सिद्धलिंग म्हेत्रे, प्रसाद साठे, चित्रसेन कोळी, खाजाभाई शेख यांच्यासह अनेक मान्यवर उपस्थित होते. आमदार देशमुख यांनी सीना भीमा खोर्यातील प्रवाशांची नवीन एसटी सुरू करून व फेर्या वाढवून गैरसोय दूर केली आहे. त्यामुळे एसटी आल्या, आता मंद्रूप बसस्थानकावर एसटीव नियंत्रण ठेवण्यासाठी व प्रवाशांच्या सेवेसाठी नियंत्रक ( कंट्रोलर ) आणा, अशी मागणी प्रवाशांनी केली आहे.
यावेळी आमदार देशमुख यांनी नवीन सुरु करण्यात आलेल्या एसटीमधून तेरामैल पर्यंत प्रवास करून प्रवाशांच्या अडचणी जाणून घेतल्या. तसेच नवीन एसटी पूजनावेळी जुनी एसटी बसस्थानकावरच बंद पडल्यामुळे आगायाप्रमुखांना मंद्रूप परीसरात चांगल्या एसटी पाठविण्याच्या सूचना दिल्या. यापूर्वी सोलापूर मंद्रूप एसटी सेवा सुरळीत असताना सोलापूर आगाराप्रमुखांनी ही सेवा बंद केली. त्यामुळे उच्च शिक्षणासाठी सोलापूरला जाणार्या विद्यार्थ्यांची गैरसोय झाली. म्हणून यापुढे ही सेवा कायमस्वरूपी सुरू ठेवण्याची मागणी विद्यार्थी व प्रवाशांनी केली आहे.
आमदारांच्या पाठपुराव्याला यश
विद्यार्थ्यांना सोलापूरला उच्च शिक्षणासाठी जाण्यास उशीर होत होता. एसटीमधून प्रवास करताना नोकरदार वर्गाला त्रास सहन करावा लागत होता. हा प्रश्न भाजपा पदाधिकाऱ्यांनी आमदार देशमुख यांच्याकडे मांडला. आमदारांनी या प्रश्नाचे गांभीर्य ओळखून तातडीने परिवहन मंत्री प्रताप सरनाईक आणि MSRTC प्रशासनाकडे शिफारस केली. त्यांच्या पाठपुराव्यामुळेच MSRTC, सोलापूर विभागाचे विभागीय नियंत्रक आणि सोलापूर डेपो मॅनेजर यांनी नवीन बस सुरू करण्याचा निर्णय घेतला. सोबतच कारकल, तेलगाव, वडापूर या गावांच्या फेऱ्या वेळेवर सोडण्याचे आणि बसस्थानकावर स्वच्छता व पिण्याच्या पाण्याची सोय करण्याचे आदेशही दिले आहेत.
….
__________________________________
*🛑नवप्रभात न्युज पोर्टल ला बातम्या व जाहिरातीसाठी संपर्क करा*
*संपादक :- अमोगसिद्ध मुंजे*
*9423535294*
