सोलापूरचा डंका आंतरराष्ट्रीय स्तरावर!

वेळापूरच्या महास्वामीजी आणि जेऊरच्या प्रा. गायत्री बिराजदार यांना ‘द ग्लोबल अचिव्हर्स अवॉर्ड 2026’ जाहीर

सोलापूर: सोलापूर जिल्ह्याच्या शिरपेचात मानाचा तुरा रोवला गेला आहे. शिक्षण, समाजसेवा, धार्मिक आणि मानवतावादी क्षेत्रात उल्लेखनीय योगदान दिल्याबद्दल जिल्ह्यातील दोन मान्यवरांना श्रीलंकेत आंतरराष्ट्रीय पुरस्काराने सन्मानित करण्यात येणार आहे. वेळापूर (ता. माळशिरस) येथील बृहन्मठाचे श्री ष.ब्र. १०८ सद्गुरू सदाशिव शिवाचार्य महास्वामीजी आणि जेऊर (ता. अक्कलकोट) येथील श्री काशीविश्वेश्वर प्रशालेच्या प्रा. गायत्री बिराजदार यांना प्रतिष्ठेचा ‘द ग्लोबल अचिव्हर्स अवॉर्ड २०२६’ जाहीर झाला आहे.

या असोसिएशनच्या वतीने 20 ते 23 सप्टेंबर दरम्यान श्रीलंकेतील कोलंबो येथील पेगासस रीफ येथे भव्य पुरस्कार सोहळ्याचे आयोजन करण्यात आले आहे. सद्गुरू सदाशिव शिवाचार्य महास्वामीजी यांचे धार्मिक कार्यासोबतच सामाजिक क्षेत्रात भरीव योगदान आहे. व्यसनमुक्ती, अंधश्रद्धा निर्मूलन आणि गुरुकुलाच्या माध्यमातून संस्कारक्षम शिक्षणाचा प्रसार त्यांनी केला आहे. विद्यार्थ्यांना शिष्यवृत्ती, शैक्षणिक साहित्य तसेच गरजू नागरिकांना अन्न, वस्त्र आणि विवाहासाठी मदत करण्याचे कार्य ते करत आहेत.
प्रा. गायत्री बिराजदार या गेल्या 16 वर्षांहून अधिक काळ ग्रामीण व सीमावर्ती भागातील विद्यार्थ्यांसाठी कार्यरत आहेत. तब्बल 12 वर्षे विनामूल्य शिक्षणसेवा देऊन त्यांनी अनेक विद्यार्थ्यांची शैक्षणिक प्रगती घडवली आहे.
जिल्ह्यातील दोन्ही मान्यवरांच्या कार्याची आंतरराष्ट्रीय स्तरावर दखल घेतली गेल्याने सोलापूरच्या शैक्षणिक व सामाजिक क्षेत्रातून त्यांच्यावर अभिनंदनाचा वर्षाव होत आहे.