कृषी कर्मचाऱ्यांचे आंदोलन चिघळले!
आकृतिबंध रद्द झाल्याशिवाय आंदोलन मागे नाही – कृषी सेवा संघटनेचा ठाम निर्धार
सोलापूर.. शासनाच्या नव्या आकृतिबंधाच्या विरोधात कृषी कर्मचाऱ्यांनी पुकारलेले “लॅपटॉप परत, सिमकार्ड परत” आंदोलन आता चिघळले आहे. हा आकृतिबंध रद्द झाल्याशिवाय आंदोलन स्थगित होणार नाही, असा आक्रमक पवित्रा महाराष्ट्र कृषी सेवा व कृषी कर्मचारी संघटनेने घेतला आहे.
सध्या जिल्ह्यात दुष्काळी परिस्थिती असताना, कर्मचाऱ्यांनी लॅपटॉप व ऑनलाइन कामांसाठी दिलेले सिमकार्ड परत केल्याने शेतकऱ्यांना मोठा फटका बसत आहे. याचा थेट परिणाम पीक विमा, दुष्काळ निधी व पीक नुकसानीच्या पंचनाम्यावर होण्याची शक्यता नाकारता येत नाही. ई-पीक पाहणी, ऑनलाइन पंचनामा, अनुदान वाटप यासारखी सर्व कामे लॅपटॉप आणि सिमवर अवलंबून आहेत. ती यंत्रणाच बंद झाल्याने दुष्काळग्रस्त शेतकऱ्यांची सरकारी मदत लांबणीवर पडण्याची भीती व्यक्त होत आहे. शेतकरी आधीच नैसर्गिक संकटात असताना, आता प्रशासकीय कामे ठप्प झाल्याने त्यांचे हाल अधिक वाढले आहेत.
शासनाने जाहीर केलेल्या नव्या आकृतिबंधामुळे पदे कमी होणार, कामाचा बोजा वाढणार आणि पदोन्नतीचे मार्ग बंद होणार असल्याचा आरोप कर्मचाऱ्यांनी केला आहे. शासनाने तात्काळ हा आकृतिबंध रद्द करून तोडगा काढावा, अन्यथा शेतकऱ्यांचे मोठे नुकसान होणार असल्याचे संघटनेने म्हटले आहे.
…………………….
* नवप्रभात न्यूज पोर्टल *
*बातम्या व जाहिरातीसाठी संपर्क करा -*
*संपादक :- अमोगसिद्ध मुंजे*
*मो. 9423535294
