उच्च व तंत्र शिक्षण मंत्री चंद्रकांत पाटील यांना निवेदन
सोलापुर
पुण्यश्लोक अहिल्यादेवी होळकर विद्यापीठ, सोलापूर येथील नव्याने बांधण्यात आलेल्या प्रशासकीय इमारतीमध्ये सिनेट बहुद्देशीय सभागृह असून या सभागृहाला सुभेदार मल्हारराव होळकर यांचे नाव देण्यात यावे. यासाठी राज्याचे उच्च तंत्र शिक्षण मंत्री चंद्रकांत पाटील यांना सोमवारी निवेदन देण्यात आले. यावेळी भाजपाचे जिल्हाध्यक्ष शशिकांत चव्हाण, भाजपा जिल्हा सचिव अमोल बापू कारंडे, प्रकाश घोडके,शंकर नरोटे, सदाशिव व्हनमाने आदी उपस्थित होते. 
मराठी सत्तेचा झेंडा अटकेपार फडकावणारे सुभेदार मल्हारराव होळकर यांचे शौर्य, पराक्रम, धाडस आणि मराठी सत्ता वाढवण्यासाठी त्यांनी दिलेल्या योगदानाची साक्ष देण्यासाठी या सभागृहाला त्यांचे नाव असणे समर्पक आहे. त्यामुळे सकल हिंदु धनगर व इतर समाज बांधवांचीही इच्छा असून या सभागृहाला सुभेदार मल्हाराव होळकर बहुद्देशीय सभागृह असे नामकरण करण्यात यावे. विद्यापीठाला त्यांच्याच सुनबाई पुण्यश्लोक अहिल्यादेवी होळकर यांचे नाव आहे. अहिल्यादेवींना राज्यकारभाराचे शिक्षण आणि प्रशिक्षण देऊन त्यांना सक्षम करण्यात सुभेदार मल्हाराव होळकर यांचे मोठे योगदान आहे. त्यांच्या मार्गदर्शनानूसारच अहिल्यादेवींनी जगात पुण्यश्लोक ही पदवी मिळवली आहे. तसेच आदर्शवत काम करुन इतिहासात अजराअमर झाल्या आहेत. त्यांना घडवण्यात सुभेदार मल्हाराव होळकरांचा सिंहाचा वाटा आहे. पराक्रमाला आणि शौर्याला स्मरण करण्यासाठी हे नामकरण करावे. अशी मागणी करण्यात आली आहे.
…………………….
* नवप्रभात न्यूज पोर्टल *
*बातम्या व जाहिरातीसाठी संपर्क करा -*
*संपादक :- अमोगसिद्ध मुंजे*
*मो. 9423535294
