समाजाच्या जडणघडणीत अंगणवाडी सेविकांचे कार्य कौतुकास्पद .. ना.चंद्रकांत पाटील
सोलापूर : अंगणवाडी सेविका या केवळ सेविका नसून बालकांच्या संगोपनात व सर्वांगीण विकासात मातृत्वाची भूमिका बजावत आहेत. समाजाची पुढील पिढी घडविण्याचे महत्त्वपूर्ण कार्य त्या करीत असून, त्यांच्या कार्याचा गौरव करणे आवश्यक आहे, असे प्रतिपादन उच्च व तंत्र शिक्षण मंत्री चंद्रकांत पाटील यांनी केले. शिवछत्रपती रंग भवन येथील सभागृहात प्रधानमंत्री नरेंद्र मोदी यांच्या वाढदिवसा निमित्त अंगणवाडी सेविकांच्या सन्मान सोहळ्याचे आयोजन करण्यात आले होते. यावेळी मंत्री चंद्रकांत पाटील यांच्या हस्ते प्राथमिक स्वरूपात २५ अंगणवाडी सेविकांचा सन्मान करण्यात आला. कार्यक्रमास उपमहापौर ज्ञानेश्वरी देवकर, भाजपा शहराध्यक्ष व नगरसेविका रोहिणी तडवळकर, स्थायी समिती सभापती रंजीता चाकोते, शिक्षणाधिकारी धनंजय ढेपे,
प्रशांत फत्तेपूरकर, शशिकांत चव्हाण, बाल विकास अधिकारी दीपक ढेपे यांच्या सह अंगणवाडी सेविका उपस्थित होत्या.
ना . चंद्रकांत पाटील म्हणाले की, अंगणवाडी सेविका बालकांच्या पोषण, संगोपन आणि विकासासाठी महत्त्वपूर्ण भूमिका बजावतात. पुढील पिढीच्या जडणघडणीत त्यांचे योगदान मोलाचे आहे. महिलांना आर्थिक व सामाजिकदृष्ट्या सक्षम करण्यासाठी विविध योजनांच्या माध्यमातून प्रयत्न करण्यात येत आहेत. महिला सक्षम झाल्यास कुटुंब आणि समाज अधिक सक्षम होतो. महिला व बालकांच्या कल्याणासाठी शासनाच्या विविध योजनांचा लाभ पात्र लाभार्थ्यांपर्यंत पोहोचविणे आवश्यक असल्याचेही त्यांनी सांगितले.
संयोजक मोहन डोंगरे यांनी अंगणवाडी सेविकांच्या कार्याचे कौतुक करताना, बालकांच्या संगोपनासह पोषण आणि सामाजिक जडणघडणीत त्या महत्त्वाची भूमिका बजावत असल्याचे सांगितले.
…………………….
* नवप्रभात न्यूज पोर्टल *
*बातम्या व जाहिरातीसाठी संपर्क करा -*
*संपादक :- अमोगसिद्ध मुंजे*
*मो. 9423535294
