उच्च न्यायालयाच्या आदेशाचे पालन
सोलापूर..
महाराष्ट्र सरकारने दुष्काळा मुळे सहकारी संस्थांची निवडणूक पुढे ढकलण्याचा निर्णय घेतला आहे परंतु सोलापूर जिल्हा मध्यवर्ती सहकारी बँकेची निवडणूक ही उच्च न्यायालयाच्या आदेशा नुसार होणार आहे . या निवडणुकीच्या नामनिर्देशन पत्र विक्री आणि स्वीकृतीचे तीन दिवस झाल्याने ही निवडणूक पुढे जाणार नाही तिची प्रक्रिया सुरू राहील अशी माहिती निवडणूक निर्णय अधिकारी तथा जिल्हा उपनिबंधक मुकुंद पवार यांनी दिली.
महाराष्ट्र सहकारी संस्था अधिनियम, १९६० मधील कलम ७३ कक मधील तरतुदीनुसार नैसर्गिक आपत्तीमुळे राज्य शासनाच्या मते सहकारी संस्थांची निवडणूक घेणे लोकहिताचे नसेल अशा बाबतीत राज्य शासनास विशेष आदेशाद्वारे सहकारी संस्थांची निवडणूक पुढे ढकलण्याचा अधिकार आहे. राज्यातील दुष्काळी परिस्थितीचा विचार करून सहकारी संस्थांची, सहकारी गृहनिर्माण संस्था तसेच ज्या प्रकरणी मा. उच्च न्यायालय / मा. सर्वोच्च न्यायालयाने सहकारी संस्थेची निवडणूक घेण्याबाबत आदेशीत केले आहे .अशा सहकारी संस्था वगळून तसेच ज्या सहकारी संस्थांच्या निवडणूकीचा नामनिर्देशनाचा टप्पा सदर आदेशाच्या दिनांकापूर्वी सुरु झाला आहे अशा सहकारी संस्था वगळून शासनाने दुष्काळ जाहिर केलेल्या जिल्ह्यातील सर्व सहकारी संस्थांची निवडणुक सध्या ज्या टप्प्यावर आहे त्या टप्प्यावरुन या आदेशाच्या दिनांकापासून पुढील आदेशापर्यंत पुढे ढकलण्यात येत आहेत.
सोलापूर जिल्हा मध्यवर्ती बँकेची निवडणूक प्रक्रिया सुरू होऊन नामनिर्देशन प्रक्रिया सुरू झाली आहे. त्यामुळे सोलापूर जिल्हा मध्यवर्ती बँकेची निवडणूक होणार असल्याचे निवडणूक निर्णय अधिकारी यांनी सांगितले.
________________
*बातम्या व जाहिरातीसाठी संपर्क करा -*
*संपादक :- अमोगसिद्ध मुंजे*
*मो. 9423535294*
