जिल्ह्यातील दुष्काळी परिस्थिती दूर करण्यासाठी सत्यमेव वॉटर कप स्पर्धा प्रभावी ठरणार
सोलापूर.. सोलापूर जिल्ह्यातील दुष्काळी परिस्थितीवर मात करण्यासाठी सत्यमेव जयते वॉटर कप स्पर्धा २०२६-२७ च्या माध्यमातून लोकसहभाग आणि श्रमदानातून जलसंधारणाची कामे प्रभावीपणे राबविण्यात येणार आहेत. पाणी फाउंडेशनला जिल्ह्यातील सर्व शासकीय यंत्रणांचे सहकार्य देण्यात येईल, असे प्रतिपादन जिल्हा परिषदेचे मुख्य कार्यकारी अधिकारी कुशल जैन यांनी केले. जिल्हास्तरीय आढावा बैठकीत ते बोलत होते. यावेळी पाणी फाउंडेशनचे राज्य मार्गदर्शक डॉ. अविनाश पोळ, राज्य समन्वयक सत्यवान देशमुख, जिल्हा समन्वयक सुशांत गायकवाड, उपजिल्हाधिकारी (रोहयो) अंजली मरोड, जिल्हा अधीक्षक कृषी अधिकारी शुक्राचार्य भोसले, मृद व जलसंधारणचे कार्यकारी अभियंता दीपक लांडगे, भूजल सर्वेक्षणचे वरिष्ठ भूवैज्ञानिक मुस्ताक शेख, डीआरडीएचे प्रकल्प संचालक चंद्रशेखर जगताप उपस्थित होते.
डॉ. अविनाश पोळ यांनी स्पर्धेचे स्वरूप स्पष्ट करताना सांगितले की, वॉटर कप स्पर्धा १०० गुणांची असून यामध्ये जलसंधारण कामांना ७० गुण तर गट शेतीला ३० गुण असतील. गावांची निवड तसेच पाणी आणि जलसंधारणा विषयी जागरूक असलेल्या नागरिकांची प्रशिक्षणार्थी म्हणून निवड हा अत्यंत महत्त्वाचा टप्पा आहे. जलसंधारण चळवळीत मनापासून योगदान देण्याची इच्छाशक्ती असलेल्या नागरिकांना पाणी फाउंडेशनमार्फत प्रशिक्षण देण्यात येणार आहे. हे प्रशिक्षण डिसेंबर २०२६ अखेर किंवा १५ जानेवारी २०२७ पर्यंत सुरू करण्याचे नियोजन आहे.
प्रशिक्षणानंतर गावातील शिवार फेरीला विशेष प्राधान्य देण्यात येणार आहे. शिवार फेरीच्या माध्यमातून पाण्याचे स्रोत, पाणलोट क्षेत्र आणि जलसंधारणासाठी आवश्यक कामांचे प्रत्यक्ष नियोजन करता येईल.
सोलापूर जिल्ह्यात यंदा अत्यल्प पावसामुळे गंभीर दुष्काळी परिस्थिती असून मोठ्या प्रमाणावर जलसंधारण कामांची आवश्यकता आहे. त्यामुळे जास्तीत जास्त गावांनी या स्पर्धेत सहभागी होऊन केवळ स्पर्धेपुरते मर्यादित न राहता पाण्याची कायमस्वरूपी उपलब्धता वाढवावी, असे आवाहनही डॉ. पोळ यांनी केले.
________________
*बातम्या व जाहिरातीसाठी संपर्क करा -*
*संपादक :- अमोगसिद्ध मुंजे*
*मो. 9423535294
