समाजकल्याण अधिकारी सोनवणे यांच्याकडून कारणे दाखवा नोटीस
सोलापूर : जिल्हा परिषदेच्या समाजकल्याण विभागातील अनुदानित वसतिगृहांच्या प्रस्तावांच्या छाननी प्रक्रियेत कथित अनियमितता आणि आर्थिक गैरव्यवहार झाल्याच्या आरोपांनी प्रशासकीय वर्तुळात खळबळ उडाली. या प्रकरणाची दखल घेत, समाजकल्याण विभागातील कनिष्ठ लिपिक मल्लिकार्जुन मळगे यांना समाजकल्याण अधिकारी सागर सोनवणे यांनी कारणे दाखवा नोटीस बजावली. मात्र मळगे यांच्या कार्यकाळात वितरित केलेल्या वसतिगृह अनुदानासंदर्भात चौकशी करून त्यांच्यावर कठोर कारवाई करण्याची मागणी छावा संघटना व मानवाधिकार संरक्षण फेडरेशन यासह विविध संघटनांनी केली आहे.
याबाबत संघटना व पालकांनी तक्रार केल्यानंतरही समाज कल्याण विभागाचे तत्कालीन प्रभारी समाज कल्याण अधिकारी प्रसाद मिरकले व कनिष्ठ लिपिक मल्लिकार्जुन मळगे यांनी नियमबाह्य अनुदान वाटप केल्याचा गंभीर आरोप करण्यात आला आहे.
मल्लिकार्जुन मळगे यांच्या कामकाजाबाबत लेखी तक्रार दाखल करण्यात आले होते . या तक्रारीत जिल्ह्यातील १५० हून अधिक अनुदानित वसतिगृहांच्या प्रस्तावांच्या छाननी प्रक्रियेतील त्रुटी आणि अनियमिततेकडे लक्ष वेधण्यात आले. वसतिगृहांची प्रत्यक्ष जागेवर जाऊन पाहणी न करणे, विद्यार्थ्यांच्या उपस्थितीची खातरजमा न करणे तसेच संबंधित कागदपत्रांची सखोल तपासणी न करताच, प्रस्तावांवर पुढील कार्यवाही केली जात असल्याचा आरोप तक्रारीत करण्यात आला आहे. शासनाच्या निर्धारित निकषांनुसार पात्रता नसतानाही, काही प्रस्ताव केवळ कागदोपत्री पुढे पाठवले जात असल्याचा दावा करण्यात आला. इतकेच नव्हे, तर काही वसतिगृहांच्या इमारतींसंदर्भात संशयास्पद आणि कथित बोगस कागदपत्रांचा वापर करून, शासकीय अनुदान मिळवण्याचा प्रयत्न झाल्याचा गंभीर आरोपही करण्यात आला आहे.
वास्तविक पाहता कनिष्ठ लिपिकाला वस्तीग्रहांचे चौकशी करून अनुदान करण्याचा अधिकार नसताना कनिष्ठ लिपिक मळगे यांनी प्रभारी समाजकल्याण अधिकारी यांच्याशी संगनमत करून जिल्ह्यातील वसतिगृहांना अनुदान वाटप केला आहे. याबाबत अनेक वेळा तक्रारदारांवर दबाव तंत्राचाही वापर करण्यात करण्यात आला आहे. त्यामुळे समाज कल्याण अधिकारी यांनी जिल्ह्यातील अनुदानित वसतिगृहांची उलट तपासणी करून कनिष्ठ लिपिक मळगे यांच्यावर शिस्तभंगाची कारवाई करण्याची मागणी करण्यात आली आहे.
________________
*बातम्या व जाहिरातीसाठी संपर्क करा -*
*संपादक :- अमोगसिद्ध मुंजे*
*मो. 9423535294
