एसटी प्रवास सवलतीबाबत मोठी बातमी
मुंबई:
महाराष्ट्र राज्य मार्ग परिवहन महामंडळाने (MSRTC) महिला प्रवाशांसाठी एक अत्यंत महत्त्वाचा आणि दिलासादायक निर्णय घेतला आहे. एसटी बस प्रवासात सवलतीचे तिकीट मिळवण्यासाठी महिला प्रवाशांना नॅशनल कॉमन मोबिलिटी कार्ड (NCMC) अनिवार्य करण्याची अट ३१ डिसेंबर २०२६ पर्यंत शिथिल करण्यात आली आहे. महामंडळाच्या वाहतूक विभागाने अधिकृत परिपत्रक जारी करून ही माहिती दिली आहे.
यापूर्वी १ ऑक्टोबर २०२६ पासून ज्येष्ठ नागरिक आणि महिला प्रवाशांना सवलतीचे तिकीट मिळवण्यासाठी NCMC कार्ड अनिवार्य करण्यात आले होते. मात्र, अनेक तांत्रिक आणि व्यावहारिक अडचणींमुळे महिला प्रवाशांना या अटीमधून तात्पुरती सूट देण्यात आली आहे.
महामंडळाने दिलेल्या माहितीनुसार, आतापर्यंत सुमारे १.१० कोटी NCMC कार्ड्सची नोंदणी व वितरण झाले आहे. मात्र, ग्रामीण आणि दुर्गम भागातील अनेक महिला प्रवाशांना या योजनेची पुरेशी माहिती नसल्याने, मोठ्या संख्येने महिलांनी अजूनही कार्डसाठी नोंदणी केलेली नाही. ही बाब लक्षात घेऊन महिला लाभार्थ्यांची गैरसोय टाळण्यासाठी ०७ नोव्हेंबर २०२६ ते ३१ डिसेंबर २०२६ या कालावधीसाठी ही सक्ती शिथिल करण्यात आली आहे.
या वाढीव कालावधीत सर्व महिला प्रवाशांचे NCMC कार्ड तयार व्हावे, यासाठी महामंडळाने विशेष मोहीम आखली आहे. ग्रामीण भागातील महिलांपर्यंत पोहोचण्यासाठी ग्रामपंचायत स्तरावर विशेष शिबिरे आयोजित केली जातील.
या शिबिरांमध्ये स्थानिक लोकप्रतिनिधी, प्रवासी संघटना आणि ग्रामपंचायत पदाधिकारी यांचा सक्रिय सहभाग घेतला जाईल.
३१ डिसेंबर २०२६ पर्यंत १०० टक्के महिला प्रवाशांची कार्ड नोंदणी व वितरण पूर्ण करण्याचे उद्दिष्ट ठेवण्यात आले आहे. महामंडळाने सर्व महिला प्रवाशांना आवाहन केले आहे की, त्यांनी या शिथिलतेच्या कालावधीचा लाभ घेऊन आपले NCMC कार्ड त्वरित नोंदवून घ्यावे, जेणेकरून भविष्यात प्रवासादरम्यान सवलतीचा लाभ घेताना कोणतीही अडचण येणार नाही.
________________
*बातम्या व जाहिरातीसाठी संपर्क करा -*
*संपादक :- अमोगसिद्ध मुंजे*
*मो. 9423535294
