मंद्रूपच्या केळीला रशियात मागणी
सोलापूर… दक्षिण सोलापूर तालुक्यातील मंद्रूप येथील हुवण्णा सिध्दप्पा व्हनमाने यांच्या शेतातील जी९ केळीला रशियाच्या बाजारपेठात मागणी असल्यामुळे पहिल्या टप्प्यात आठ टन केळीची निर्यात करण्यात आली आहे . मंद्रूप येथील केळीचे व्यापारी जाफर बागवान यांनी रशिया येथील कंपनीशी समन्वय साधून व्हनमाने यांची केळी रशियाला पाठविली आहे . त्यामुळे मंद्रूपमधील शेतकर्याची केळी रशियाच्या बाजारपेठेत पोहोचल्याने सचिन अंकुश व्हनमाने या तरूण शेतकर्यामुळे मंद्रूपच्या शिरपेचात मानाचा तुरा रोवला आहे.
रशिया येथे जी९ केळीला पंधरा रुपये दर मिळत असल्यामुळे व्हनमाने यांनी रशियाला केळी पाठवण्याचा निर्णय घेतला . त्यानुसार मंद्रूप ची केळी रशियाला पोहोचल्याने मंद्रूपच्या शेतकर्यांमधून समाधान व्यक्त करण्यात येत आहे.
जानेवारी २०२५ मध्ये हुवण्णा व्हनमाने यांच्याबरोबर त्यांचे नातू सचिन व्हनमाने यांनी जी९ केळी लागवड करून शेतकरीमित्र राजकुमार घाटे यांच्याकडून मार्गदर्शन घेतला. यावेळी घाटे यांनी वारंवार केळी बागेला भेट देऊन औषध फवारणी व अंतरमशागत बाबत मार्गदर्शन केले. त्यानंतर सचिन व्हनमाने यांनी सर्व रोगांपासून केळी बागेचे संरक्षण करीत केळी बागेची उत्तम निगा राखली. त्यानंतर पंधरा दिवसापूर्वी त्यांची केळी पाहणी केल्यानंतर रशियाच्या व्यापार्याकडून केळी पाठविण्यास सांगण्यात आले. पहिल्या टप्यात साडे आठ टन केळी काढण्यात आली असून पंधरा रूपये किलोप्रमाणे विक्री करण्यात आली आहे. आणखी दोन टप्यात पंधरा ते वीस टन केळी उत्पादन निघणार आहे. एक वर्षात दीड लाख रूपये खर्च करून केळी लागवड केल्यानंतर चार ते पाच लाख उत्पन्न मिळाल्याने व्हनमाने परिवारामधून समाधान व्यक्त करण्यात येत आहे. व्हनमाने यांच्या शेती क्षेत्रातील यशाबद्दल माळकवठे मठाचे श्री पंचाक्षरी महास्वामीजी, उपसरपंच भगवान व्हनमाने, दक्षिण सोलापूर तालुका कृषी अधिकारी अवधूत मुळे व मंद्रूपचे कृषी सहायक रमेश फरतडे तसेच बार्शी येथील राठोड बायोटेकचे गणेश राठोड यांनी अभिनंदन केला आहे.
