”धोत्रीच्या जिल्हा परिषद शाळेला पोलिसांकडून 6 लाखांची भेट”
दक्षिण सोलापूर, : दक्षिण सोलापूरचे बीडीओ मनोज राऊत यांनी ग्रामीण भागातील मुलांनी इंग्रजीत ‘फाडफाड’ बोलावे, यासाठी सुरू केलेल्या ‘स्पोकन इंग्लिश’ या ड्रीम प्रोजेक्टला आता पोलीस प्रशासनाने हातभार लावला आहे. जिल्हा परिषदेचे सीईओ कुशल जैन यांनी या उपक्रमाचे कौतुक करून तो संपूर्ण जिल्ह्यात राबवणार असल्याचे जाहीर केल्यानंतर आता पोलीस अधीक्षक अतुल कुलकर्णी आणि वळसंगचे सहायक पोलीस निरीक्षक राहुल डोंगरे यांनी मोठी मदत केली आहे.
पोलीस प्रशासनाकडून दक्षिण तालुक्यातील धोत्री येथील जिल्हा परिषद प्राथमिक मराठी केंद्र शाळेला 2 लाखांचा इंटरॅक्टिव्ह स्मार्ट बोर्ड आणि 4 लाखांची हायड्रोजन गॅस प्रणाली* अशा एकूण 6 लाख रुपयांच्या शैक्षणिक साहित्याची भेट देण्यात आली आहे.
बीडीओ मनोज राऊत यांनी दक्षिणमधील जिल्हा परिषद शाळांमध्ये आमूलाग्र बदल घडवून आणला आहे. मुलांनी पहिलीपासूनच इंग्रजीत बोलावे, वाचावे, फलकलेखन आणि परिपाठ इंग्रजीत करावा यासाठी त्यांनी शिक्षकांच्या बैठका घेऊन नवीन अभ्यासक्रम तयार केला आहे. बोलीभाषेचे थेट इंग्रजीत भाषांतर करून ते मुलांमध्ये आवड निर्माण करत आहेत. त्याचा परिणाम म्हणून अनेक शाळांमधील मुले आता आत्मविश्वासाने इंग्रजीत बोलू लागली आहेत. शाळांना ‘फाईव्ह स्टार’ दर्जा देण्याचे त्यांचे स्वप्न आहे. त्यांच्या या तळमळीची दखल घेत पोलीस अधीक्षकांनी ही मदत केली असून, यामुळे शिक्षक, विद्यार्थी आणि पालकांमध्ये समाधान व्यक्त होत आहे.
शैक्षणिक विकासाला नवी दिशा आणि नवी ऊर्जा
‘ विद्यार्थ्यांना गुणवत्तापूर्ण व आधुनिक शिक्षण मिळावे यासाठी मिळालेली ही भेट अत्यंत प्रेरणादायी आहे. या आधुनिक तंत्रज्ञानामुळे शिक्षण अधिक आनंददायी आणि कृतीशील होईल. शाळेच्या विकासाला नवी दिशा मिळाली आहे.”
मनोज राऊत, बीडीओ , पंचायत समिती , दक्षिण सोलापूर
__________________________________
*🛑नवप्रभात न्युज पोर्टल ला बातम्या व जाहिरातीसाठी संपर्क करा*
*संपादक :- अमोगसिद्ध मुंजे*
*9423535294*
