शेंडगे वस्तीच्या रस्त्याला स्थगिती
आम्हाला रस्ता करून द्या.. शेंडगे वस्तीच्या शेतकर्यांची विनंती
मंद्रूप…
ठेकेदारांना कार्यारंभ आदेश देऊन एका महिन्यानंतर दुसर्या ठेकेदारांनी तक्रार केल्यामुळे अनेक दिवसांपासून वादात सापडलेल्या रस्त्याचे काम बंद ठेवण्याचे आदेश बांधकाम उपअभियंता यांनी दिली आहे. त्यामुळे मंद्रूपमधील शेंडगे वस्तीच्या शेतकर्यांना पुन्हा राजकीय गटबाजी व ठेकेदारांच्या वादाचा फटका बसला आहे. स्थानिक राजकारण व अधिकार्यांच्या दबावतंत्राचा फटका मंद्रूपच्या शेतकर्यांना फटका बसल्यामुळे राजकारणापेक्षा आम्हाला आमच्या हक्काचा रस्ता करून द्या, अशी विनंती शेतकरी करीत आहेत.
अनेक वर्षांपासून शेंडगे वस्तीच्या रस्त्याचा विषय प्रलंबित आहे. यासाठी शेतकर्यांनी आमदारांची भेट घेऊन निधीची मागणी केली. त्यानंतर जनसुविधाअंतर्गत लोकसेवा शाळेपासून शेंडगे वस्तीपर्यंत २० लाख रूपयांची निधी मंजूर करण्यात आली. या कामाचा ठेका मिळविताना भुरीकवठे येथील आशीर्वाद मजूर संस्था व माळकवठे येथील अमोगसिध्द मजूर संस्था यांच्यामध्ये स्पर्धा होती. यामध्ये ६ एप्रिलला माळकवठे येथील मजूर संस्थेला रस्ता करण्याचा कार्यारंभ आदेश देण्यात आला. त्यामुळे ठेकेदारांनी काम करण्यास सुरूवात केली. मात्र भुरीकवठे येथील संस्थेनी शेंडगे वस्तीच्या रस्त्याच्या कामाबद्दल तक्रार केल्यानंतर दक्षिणच्या गटविकास अधिकारी मनोज राऊत यांनी सुनावणी घेऊन ठेकेदारांमधिल वाद मिटविण्याचे आदेश दिले. ठेकेदारांच्या वादात विकास निधि परत जाऊ नये, याची दक्षता घेण्याची सूचना केली. त्यानुसार दक्षिण पंचायत समिती बांधकाम विभागाच्या उपअभियंता यांनी ठेकेदारांमधील वाद मिटेपर्यंत काम बंद ठेवण्याचे आदेश दिले.
एकीकडे दक्षिणच्या बांधकाम विभागाकडून कार्यारंभ मिळाल्यानंतर सहा महिन्यात काम पूर्ण करण्याचे आदेश देण्यात आली आहे. तर दुसरीकडे तक्रारीमुळे एक महिना काम सुरू करता आले नाही. शिवाय महिन्यानंतर पावसाळा सुरू होणार आहे. त्यामुळे ठेकेदाराला मुदतवाढ मिळणार का ? असा सवाल उपस्थित करण्यात येत आहे.
दक्षिण पंचायत समितीकडे मंद्रूपमधील निकृष्ट कामाबद्दल अनेक तक्रारी असताना ‘अर्थ’पूर्ण चर्चामुळे ती विकासकामे थांबविण्याचे आदेश देण्यात आले नाही. त्यामुळे कोट्यावधी रूपये पाण्यात गेली आहेत. याकडे अधिकारी गांभीर्याने न पाहता स्थानिक राजकारण व गटबाजीत हस्तक्षेप करीत शेतकर्यांच्या जिव्हाळ्याच्या रस्त्याला जाणिवपूर्वक स्थगिती देऊन प्रशासनही राजकारण करीत असल्याची चर्चा सुरू आहे.
…..
ठेकेदारांनी वाद मिटवून घ्यावे
…
मंद्रूप येथील शेंडगे वस्तीच्या रस्त्याच्या कामाचे कार्यारंभ देण्यात आले. मात्र भुरीकवठे येथील मजूर संस्थेने तक्रार केल्यामुळे रस्त्याचे काम बंद ठेवण्याचे आदेश देण्यात आले आहे. त्यामुळे दोन्ही ठेकेदारांनी आपापसातील तक्रार मिटवून घेतल्यानंतरच काम करण्याच्या सूचना देण्यात आली आहे. अन्यथा २० लाख रूपये निधी परत जाण्याची शक्यता आहे.
मनोज राऊत, गटविकास अधिकारी, पंचायत समिती दक्षिण सोलापूर
….
शेतकर्यांच्या त्रासाचे विचार करावे
…
शेंडगे वस्तीच्या रस्त्याचा विषय अनेक वर्षांपासून प्रलंबित आहे. शेतकर्यांच्या पाठपुराव्यामुळे २० लाख निधी मिळाला आहे. मात्र ठेकेदारांमधील वाद व अधिकार्यांच्या दबावतंत्रामुळे रस्त्याचे काम बंद ठेवण्याचे आदेश देण्यात आले आहे. महिन्यानंतर पावसाळा सुरू होणार असून यामुळे शेतकर्यांना त्रास होणार आहे. म्हणून अधिकार्यांनी राजकारण न करता रस्ता करण्याचे आदेश द्यावे.
रेवणसिध्द शिंगडगाव,
शेतकरी, मंद्रूप
….
__________
“नवप्रभात न्युज पोर्टल”ला बातम्या व जाहिरातीसाठी संपर्क करा.
संपादक :- अमोगसिद्ध मुंजे
9423535294
