मुख्य कार्यकारी अधिकारी कुलदीप जंगम यांचे घरकुल लाभार्थ्यांसाठी दिलासादायक निर्णय
सोलापूर,
सोलापूर जिल्ह्यातील ग्रामीण भागातील घरकुल बांधणीस गती देण्यासाठी सोलापूर जिल्हा प्रशासनाकडून महत्त्वपूर्ण पाऊल उचलण्यात येत आहेत. प्रधानमंत्री आवास योजनेंतर्गत पात्र लाभार्थ्यांना पाच ब्रास मोफत वाळू उपलब्ध करून देण्यात येणार असून यासाठी ग्रामविकास अधिकार्यांकडून घरकुल बांधकाम तपासणी करण्यात येणार असल्याची माहिती जिल्हा परिषदेचे मुख्य कार्यकारी अधिकारी कुलदीप जंगम यांनी दिली.
शासनाच्या या निर्णयामुळे घरकुल लाभार्थ्यांना मोठा दिलासा मिळाला आहे. मोफत वाळू वितरणाच्या या उपक्रमामुळे घरकुल बांधणीला वेग आला असून, ‘घरकुलाचे स्वप्न’ साकार होण्याचा मार्ग अधिक सुकर झाला आहे.
घरकुल बांधणी करताना वाळूचा खर्च हा ग्रामीण कुटुंबांसाठी मोठा आर्थिक बोजा ठरतो.
घरकुल बांधकाम प्रत्यक्ष सुरू असल्याची खात्री करूनच वाळूचे वाटप करण्यात येते. यामुळे अपात्र लाभार्थ्यांकडे वाळू वळवली जाणार नाही, याची दक्षता घेतली जात आहे. या प्रक्रियेत कोणतीही गैरसोय होऊ नये, यासाठी स्थानिक प्रशासन, महसूल विभाग आणि ग्रामपंचायत स्तरावर समन्वय साधला जात आहे. ज्या लाभार्थ्यांना वाळू वितरण करावयाची आहे त्यांना यापूर्वीच वाळू देण्यासंबंधीचे सूचना दिल्या जातात. त्यानुसार त्यांची यादी तयार करून लाभार्थ्यांची सर्व कागदपत्रे एकत्रित करून त्यांच्या मोबाईलवर ओटीपी पाठवला जातो. ओटीपी तपासणी झाल्यानंतर संबंधित लाभार्थ्याच्या नावाने पाच ब्रास पैकी दोन ब्रास व त्यानंतर तीन ब्रास अशाटप्प्याटप्प्याने प्रत्येक लाभार्थ्यांना पाच ब्रास वाळूचे मोफत वितरण केले जात आहे. आत्तापर्यंत ६५३ लाभार्थ्यांना १८०० ब्रास वाळू वितरण झाले असून, त्या पद्धतीने घरकुलाचे कामकाज सुरू असल्याचेही जंगम यांनी सांगितले.
__________________________________
*🛑नवप्रभात न्युज पोर्टल ला बातम्या व जाहिरातीसाठी संपर्क करा*
*संपादक :- अमोगसिद्ध मुंजे*
*9423535294*
