जुळे सोलापूरात नाट्यगृह होणार आमदार सुभाष देशमुख यांची माहीती
सोलापूर : जुळे सोलापुरात नाट्यगृह उभारण्याच्या दृष्टीने महत्त्वाची घडामोड घडली असून आरटीओ कार्यालयाजवळ महापालिकेची सुमारे दीड एकर जागा उपलब्ध झाल्याने नाट्यगृह उभारणीचा मार्ग मोकळा झाला आहे. ही माहिती आमदार सुभाष देशमुख यांनी दिली.
गेल्या सात ते आठ वर्षांपासून जुळे सोलापुरात नाट्यगृह उभारण्याची मागणी नागरिकांकडून होत होती. या मागणीच्या पार्श्वभूमीवर आमदार देशमुख योग्य जागेच्या शोधात होते. मात्र आतापर्यंत योग्य जागा उपलब्ध होत नव्हती. आता आरटीओ कार्यालयाजवळ महापालिकेची सुमारे दीड एकर जागा उपलब्ध असल्याचे समोर आले आहे. या ठिकाणी आधुनिक व सुसज्ज नाट्यगृह उभारता येऊ शकते, असे आमदार देशमुख यांनी सांगितले. दरम्यान, दिनांक २१ मार्च रोजी सांस्कृतिक कार्यमंत्री आशिष शेलार सोलापूर दौऱ्यावर येत असून त्यांना ही जागा दाखवून नाट्यगृह उभारण्यासाठी मंजुरी देण्याची मागणी करण्यात येणार आहे.
जुळे सोलापुरातील नागरिक, नाट्यरसिक व सांस्कृतिक क्षेत्रातील व्यक्तींनी अनेक वर्षांपासून नाट्यगृहाची मागणी केली होती. त्यामुळे या ठिकाणी नाट्यगृह उभारण्यास मंजुरी मिळाल्यास सोलापूरच्या सांस्कृतिक चळवळीला मोठी चालना मिळणार असल्याची अपेक्षा व्यक्त केली जात आहे.
__________________________________
*🛑नवप्रभात न्युज पोर्टल ला बातम्या व जाहिरातीसाठी संपर्क करा*
*संपादक :- अमोगसिद्ध मुंजे*
*9423535294*
