सोमवार व गुरुवार विभागप्रमुखांना मुख्यालयात राहणे बंधनकारक
झेडपी अध्यक्ष, उपाध्यक्षांची सूचना
सोलापूर…
जिल्हा परिषदेच्या प्राथमिक शाळांना शिपाई नाहीत. त्यामुळे शाळांची स्वच्छता शिक्षक व विद्यार्थ्यांकडून केली जाते. यासंदर्भात शासन निर्णय निघाला असून जिल्हा परिषद शाळा स्वच्छ करण्याची जबाबदारी संबंधित ग्रामपंचायतींची आहे. त्यानुसार आठवड्यातून दोन दिवस ग्रामपंचायतींनी त्यांच्याकडे उपलब्ध असणाऱ्या कर्मचाऱ्यांकडून शाळांची स्वच्छता करावी, अशी सूचना उपाध्यक्ष इंद्रजित पवार यांनी केली.
जिल्हा परिषदेच्या कामानिमित्त येणाऱ्या ग्रामीण भागातील जनतेची गैरसोय टाळण्यासाठी सोमवार व गुरुवार दोन दिवस सर्व विभागप्रमुखांनी मुख्यालयातच उपस्थित राहावे, अशा सूचना जिल्हा परिषदेचे अध्यक्ष दीपक वैद्य व उपाध्यक्ष इंद्रजित पवार यांनी दिले.
विविध विभागाचा आढावा घेतल्यानंतर ग्रामपंचायत, आरोग्य, प्राथमिक, माध्यमिक शिक्षण व योजना विभागाचा अध्यक्ष, उपाध्यक्षांकडून आढावा घेण्यात आला. त्यावेळी त्यांनी प्रशासनाला सूचना केली.
जिल्हा परिषदेच्या प्राथमिक शाळा, आरोग्य केंद्रे व अंगणवाड्या यांच्या वीज बिलाचा प्रश्न नेहमी निर्माण होतो. त्यामुळे वीज बिलाच्या कटकटीतून मुक्त होण्यासाठी शाळा, आरोग्य केंद्रे व अंगणवाड्यांवर सौर पॅनल बसविण्याबाबत कार्यवाही करण्यात यावी, अशी सूचना बैठकीत करण्यात आल्यानंतर सीईओ कुलदीप जंगम यांनी सौर पॅनल बसविण्याबाबत नियोजन करून चार टप्प्यात हे काम पूर्ण करण्यात येणार असल्याचे सांगितले.
__________________________________
*🛑नवप्रभात न्युज पोर्टल ला बातम्या व जाहिरातीसाठी संपर्क करा*
*संपादक :- अमोगसिद्ध मुंजे*
*9423535294*
