इंगळगी झेडपी शाळेतील चिमुकल्यांचा आमदार सुभाष देशमुख यांना सवाल
सोलापूर, – दक्षिण सोलापूर तालुक्यातील इंगळगी येथील जिल्हा परिषद प्राथमिक मराठी शाळेत आज एक आगळावेगळा उपक्रम पार पडला. आमदार श्री सुभाष (बापू) देशमुख यांच्या भेटीदरम्यान पहिली ते सातवीच्या विद्यार्थ्यांनी त्यांच्याशी थेट प्रश्नोत्तरांच्या माध्यमातून संवाद साधला. “आपले शिक्षण कुठे झाले?”, “आपण राजकारणात कसे आलात?”, “आपल्याला आमदार का व्हावेसे वाटले?” अशा विविध प्रश्नांची सरबत्ती चिमुकल्यांनी केली.
आमदार देशमुख यांनी विद्यार्थ्यांच्या प्रत्येक प्रश्नाला मनमोकळेपणाने उत्तरे देत मार्गदर्शन केले. त्यांनी सांगितले की, त्यांचे प्राथमिक व माध्यमिक शिक्षण तुळजापूर तालुका तसेच उत्तर सोलापूर तालुक्यातील वडाळा येथे झाले. व्यवसायातूनच आपण अपघाताने राजकारणात प्रवेश केल्याचे त्यांनी नमूद केले. “राजकारणापेक्षा समाजकारण आणि उद्योग क्षेत्राची मला अधिक आवड आहे,” असे स्पष्ट करत त्यांनी विद्यार्थ्यांना चांगले शिक्षण घेऊन आदर्श समाज घडवण्याचे आणि राष्ट्रनिर्मितीत योगदान देण्याचे आवाहन केले.
यावेळी विद्यार्थ्यांनी विविध उपक्रमांचे सादरीकरण करून आपली मतेही व्यक्त केली. शाळेच्या विकासासाठी पुण्यातील एका कंपनीच्या सीएसआर निधीतून आठ लाख रुपयांची मदत उपलब्ध करून दिल्याबद्दल ग्रामस्थांनी आमदार देशमुख यांचे आभार मानले.
कार्यक्रमास दक्षिण पंचायत समिती सदस्य अंबिका पाटील, कृषी उत्पन्न बाजार समितीचे संचालक अतुल गायकवाड, सरपंच विनोद बनसोडे, शिवदारे हायस्कूलचे अध्यक्ष संभाजी माने, चंद्रकांत गुरव, इनोदगी कोटे, भुताळी गाडेकर, राहुल वंजारे, प्रधान गुरव, गोरख माळी, सागर धुळवे, भीमाशंकर कोळी, मुख्याध्यापक विलासराव देशमुख, शिक्षक डॉ. अनिल सर्जे, शेखलाल शेख, शाळा व्यवस्थापन समितीचे अध्यक्ष निकम, उपाध्यक्ष सोनकडे, तसेच ग्रामस्थ मोठ्या संख्येने उपस्थित होते.
________________________________
*🛑नवप्रभात न्युज पोर्टल ला बातम्या व जाहिरातीसाठी संपर्क करा*
*संपादक :- अमोगसिद्ध मुंजे*
*9423535294*
