पुणे विभागाच्या आयुक्तपदी प्रथमच महिला अधिकाऱ्याची नियुक्ती
सोलापूर.. सोलापूर महानगरपालिकेचे तत्कालीन आयुक्त शितल तेली—उगले यांची पुणे विभागीय आयुक्त म्हणून नियुक्ती करण्यात आली आहे. चंद्रकांत पुलकुंडवार यांच्या जागी त्यांची नियुक्ती करण्यात आली आहे. राज्य सरकारने भारतीय प्रशासकीय सेवेतील वरिष्ठ अधिकारी शीतल तेली-उगले यांच्याकडे या महत्त्वपूर्ण पदाची जबाबदारी सोपवली असून, या निर्णयामुळे प्रशासकीय वर्तुळात त्यांचं कौतुक होत आहे.
शितल तेली-उगले यांनी २१ नोव्हेंबर २०२२ ते १८ फेब्रुवारी २०२५ या कालावधीत सोलापूर महापालिका आयुक्त म्हणून कार्यभार सांभाळला आहे. सोलापूर महानगरपालिकेच्या इतिहासातील त्या पहिल्या महिला आयुक्त ठरल्या आहेत.
त्यांच्या अडीच वर्षांच्या कार्यकाळात उजनी-सोलापूर दुहेरी जलवाहिनीच्या कामाला गती देणे, स्मार्ट सिटी प्रकल्प, आणि महापालिका इमारतीचे नूतनीकरण यांसारखे अनेक महत्त्वाचे निर्णय घेण्यात आले.
१८ फेब्रुवारी २०२५ रोजी त्यांची सोलापूरातून बदली करण्यात आली व त्यांच्या जागी डॉ. सचिन ओम्बासे सोलापूरचे नवे मनपा आयुक्त झाले. याशिवाय त्यांनी नागपूर, रायगड, पुणे या जिल्ह्यात विविध क्षेत्रात उल्लेखनीय कार्य केली आहे.
पुणे विभागीय आयुक्त पदाची निर्मिती झाल्यापासून आजवर अनेक अनुभवी पुरुष अधिकाऱ्यांनी हे पद भूषवले आहे. मात्र, शीतल तेली-उगले यांच्या नियुक्तीने हा अनेक दशकांचा पायंडा मोडला असून, पुणे विभागाचे नेतृत्व करणाऱ्या त्या पहिल्या महिला अधिकारी ठरल्या आहेत. पुणे विभागातील पुणे, सोलापूर, सांगली, सातारा व कोल्हापूर पाच जिल्ह्यांच्या समन्वयाची धुरा त्यांच्या खांद्यावर आहे. या मोठ्या भौगोलिक क्षेत्रातील महसूल प्रशासन, कायदा व सुव्यवस्था आणि विकासकामांचे नियोजन करण्याची जबाबदारी आता तेली-उगले पार पाडणार आहेत. त्यांच्या अनुभवाचा फायदा पश्चिम महाराष्ट्रातील विकास प्रकल्पांना गती देण्यासाठी होईल, अशी अपेक्षा व्यक्त केली जात आहे. विभागीय आयुक्त हे पद राज्य सरकार आणि जिल्हा प्रशासन यांच्यातील महत्त्वाचा दुवा असल्याने या नियुक्तीला विशेष महत्त्व प्राप्त झाले आहे.
….
नवप्रभात न्युज पोर्टलला बातम्या व जाहिरातीसाठी संपर्क करा.
संपादक :- अमोगसिद्ध मुंजे
9423535294
