विशेष पथकाद्वारे आरोपींचा शोध सुरू
विजयपूर –
भीमातीर परिसरात घडलेल्या भीषण सामूहिक हत्याकांडाप्रकरणी चडचण पोलीस ठाण्यात १२ जणांविरुद्ध गुन्हा दाखल करण्यात आला आहे. जमीनीच्या वादातून खून करण्यात आल्याचे सांगण्यात येत आहे. चैतन्यकुमार दुंडप्पा निराळे यांच्या फिर्यादीवरून २९ मे रोजी हा गुन्हा दाखल करण्यात आला. गोविंदपूर येथील कल्लणगौड ईश्वरगौड पाटील यांच्यासह १२ जणांना आरोपी करण्यात आले आहे.
घटनेनंतर उत्तर विभागाचे आयजीपी संदीप पाटील आणि जिल्हा पोलीस अधीक्षक लक्ष्मण निंबरगी यांनी घटनास्थळी भेट देऊन पाहणी केली. आरोपींच्या अटकेसाठी विशेष पथक स्थापन करण्यात आले असून लवकरच त्यांना अटक करण्यात येईल, असे अधिकाऱ्यांनी सांगितले.
दुंडप्पा रेवणसिद्धप्पा निराळे (६५), शिवपुत्र रेवणसिद्ध निराळे (५८), राहुल निराळे (२५), समर्थ निराळे (२३) आणि शब्बीर अत्तार (४५) यांचा मृत्यू झाला. शनिवारी शवविच्छेदनानंतर चडचण येथे अंत्यसंस्कार करण्यात आले.
गोविंदपूर येथील जमिनीच्या वादातून ही घटना घडल्याचे सांगण्यात येत आहे. निवरगी गावातील तेली कुटुंबाची जमीन अनेक वर्षांपासून पडीक होती. सुमारे पाच ते सहा महिन्यांपूर्वी निराळे कुटुंबाने ती जमीन विकत घेतली होती. जमिनीवरील काटेरी झुडपे काढून साफसफाईचे काम सुरू असताना आरोपींनी विरोध केला. या संदर्भात तहसीलदार न्यायालयातही वाद सुरू होता आणि निकाल निराळे कुटुंबाच्या बाजूने लागला होता. त्यानंतरही आरोपींनी घटनास्थळी येऊन पीडितांच्या डोळ्यांत तिखट पावडर फेकली आणि धारदार शस्त्रांनी हल्ला करून त्यांची हत्या केल्याची चर्चा सुरू आहे.
तेली कुटुंबातील एका युवतीशी कल्लणगौड पाटील यांच्या मुलाने पळून जाऊन विवाह केला होता. त्यानंतर झालेल्या वैमनस्यातून त्याचा ट्रॅक्टरखाली चिरडून खून करण्यात आल्याचा गुन्हा नोंद आहे. त्या प्रकरणानंतर संबंधित जमीन अनेक वर्षे पडीक राहिली होती. पुढे ती जमीन निराळे कुटुंबाने खरेदी केल्यानंतर पुन्हा वाद निर्माण झाला आणि त्याचे रूपांतर या भीषण हत्याकांडात झाल्याचे सांगितले जात आहे.
गोविंदपूर गावात शुक्रवारी दुपारी सुमारे २.३० ते ३ वाजण्याच्या दरम्यान शेतात काम सुरू असताना चाकू, कोयता आणि इतर धारदार शस्त्रांनी हल्ला करण्यात आला. या घटनेत एका कुटुंबातील पाच जणांसह एकूण सहा जणांचा घटनास्थळीच मृत्यू झाला, तर आणखी दोघेजण जखमी झाले आहेत. पोलीस अधीक्षक यांच्या नेतृत्वाखाली विशेष तपास पथक स्थापन करण्यात आले आहे. आरोपींबाबत महत्त्वाची माहिती मिळाली असून त्यांना लवकरच अटक करण्यात येईल.
— संदीप पाटील, आयजीपी, उत्तर विभाग
*************
नवप्रभात न्युज पोर्टलला बातम्या व जाहिरातीसाठी संपर्क करा.
संपादक :- अमोगसिद्ध मुंजे
मो.नं. 9423535294
