शाळेच्या ५० मीटर परिसरात जंक फूड विक्रीस मनाई,
नियम मोडणाऱ्यांवर होणार कारवाई
सोलापूर,.. नागरिकांना स्वच्छ आणि सुरक्षित अन्न मिळावे यासाठी अन्न व औषध प्रशासनाने मोठी मोहीम हाती घेतली आहे. दूध वाहतुकीसाठी प्लास्टिक कॅनचा वापर टाळा आणि हॉटेलमधील तयार अन्नात अनावश्यक खाद्यरंग वापरू नका, असे कडक आवाहन सहाय्यक आयुक्त साहेबराव देसाई यांनी केले आहे.
दूध वाहतुकीसाठी प्लास्टिक कॅनचा वारंवार वापर केल्यास प्लास्टिकमधील घातक घटक दुधात मिसळण्याची शक्यता असते. यामुळे मानवी आरोग्यास धोका निर्माण होतो. त्यामुळे जिल्ह्यातील सर्व दूध उत्पादक संस्था, संकलन केंद्रे आणि वाहतूकदारांनी स्टेनलेस स्टीलच्या कॅनचा वापर करावा.
हॉटेल, रेस्टॉरंट, चायनीज सेंटर आणि बिर्याणी विक्रेत्यांनी ग्राहकांच्या आरोग्यासाठी खाद्यरंगाचा वापर करू नये. फक्त स्वीट आणि बेकरी पदार्थांसाठी मर्यादित प्रमाणात (१०० PPM पर्यंत) परवानगी असून त्यासाठीही नियम पाळणे बंधनकारक आहे.
अन्न सुरक्षा आयुक्त, महाराष्ट्र राज्य यांच्या निर्देशानुसार शाळेच्या प्रवेशद्वारापासून ५० मीटर परिसरात जास्त साखर, मीठ आणि तेल असलेल्या पदार्थांच्या विक्री व उत्पादनावर मनाई करण्यात आली आहे. लहान मुलांच्या आरोग्यासाठी हा निर्णय घेण्यात आला आहे.
अन्न व औषध प्रशासनाच्या वतीने जिल्हाभरात विशेष तपासणी मोहीम राबवण्यात येत आहे. प्लास्टिक कॅन वापरणारे दूध विक्रेते, नियमबाह्य रंग वापरणारे हॉटेल चालक आणि शाळेजवळ जंक फूड विकणाऱ्यांवर अन्न सुरक्षा व मानके कायदा २००६ अंतर्गत कठोर कारवाई करण्यात येणार असल्याचे देसाई यांनी स्पष्ट केले आहे.
________________
*बातम्या व जाहिरातीसाठी संपर्क करा -*
*संपादक :- अमोगसिद्ध मुंजे*
*मो. 9423535294*
